Nabati sa mga lokal nga ekonomista ang kalabalaka sa mga gagmay’ng depositors nga maminusan ang ilang tinigum sa mga bangko kay kuhaan na kini’g 20% isip with holding tax.
Namahayag si Micro, Small, and Medium Enterprises – Misamis Oriental – Cagayan de Oro Chapter President Ray Talimio Jr nga normal kini nga reaksiyon apan, kini nga klase sa buhis napatuman na niadtong Hulyo 1.
Kini nga balaod mao ang pag-imposar sa Republic Act No. 12214, o mas giila isip Capital Markets Efficiency Promotion Act (CMEPA).
Mipasabot si Talimio nga gihimo ang maong balaod aron i-awhag ang mga Pilipino nga magtigom ug mag-andam alang sa ilang retirement o sa ilang kaugmaon.
Tumong usab niini ang pagtul-id ug pagpahapsay sa pagbuhis sa passive income ug financial intermediaries sama sa mga kinitaan sa credit cooperatives, pension funds,Insurance companies, Investment banks / mutual fund companies ug Microfinance institutions.
Gumikan niini, gi-enkorahe ni Talimio, ang katawhan nga magdeposito sa sa bangko, ug dili mahadlok sa implementasyon sa bag-ong balaod.
Gitin-aw sa ekonomista nga adunay pagkalibog o misconception sa social media kalabot niini kundiin, walay labot ang prinsipal saving nga kuhaan sa buwis, apan, ang tubo o interest lamang sa tinigom ang kuhaan sa 20% nga buhis sa gobyerno, ilabe na sa mga nagbukas sa time deposite, kay angayan lamang nga adunay ratio and proportion matag deposito.
