Nakumpiska sa mga otoridad ang gibana-banang 200 ka kilo nga shabu nga nagkantidad og 1.36 bilyon pesos sa usa ka shipment sa Manila International Container Port (MICP) sa North Harbor, Manila.
Sumala sa Bureau of Customs (BOC) ug Philippine Drug Enforcement Agency (PDEA), nadiskubre sa maong shipment nga gideklarang karton lang ang anaa sa 200 ka pakete sa methamphetamine hydrochloride o shabu niadtong Oktubre 15.
Matud ni Interior Secretary Jonvic Remulla, nagpakita kini sa resulta sa pagtinabangay sa mga nasud nga miyembro sa ASEAN aron mapugngan ang ilegal nga droga, diin ang intelligence report bahin niini kay nagagikan sa nasud sa Vietnam.
Gipasiugda usab sa kalihim nga usa kini ka kadaugan sa nasud sa kampanya niini batok sa ilegal nga droga, diin walay pagpatay nga nahitabo tungod kay ang gitarget sa kagamhanan kay ang tinubdan mismo ug dili ang mga ordinaryong tawo lamang. (raniel mahunyag)
