CAGAYAN DE ORO CITY-Pakyas ang ‘demolition team’ sa pagguba sa 220 ka mga panimalay nga nahimutang sa Purok 12, Sitio Baloy, Brgy Tablon ning syudad.
Kini human gibabagan sa legal counsel sa mga residente nga si Atty Dale Brian Mordeno ang pagguba sa mga panimalay tungod kay mibati siya’g kalooy sa mga residente nga mawad-ag’ balay.
Maisogon nga gihagit ni Mordeno ang ‘demolition team’ nga andam siyang magpakamatay kun ugaling ihinayon ang pagguba sa mga panimalay.
Gipamugos ni court sheriff Fernando Luncion nga igo lamang niya gituman ang kamanduan ni RTC Branch 2 Hon Judge Eleuteria Badoles-Algodon nga e-demolish ang 220 ka balay Brgy Tablon.
Siya miingon nga kon magpatigbabaw ang iyang kalooy sa mga residente, mawad-an usab siya’g trabaho.
Gibutyag usab niini nga adunay ihatag nga 20,000 nga cash assistance ang complainant nga Himare Corporation alang sa mga apektadong pamilya.
Gitin-aw ni Mordeno nga wala siya’y kwestyon sa kamanduan sa korte.
Apan, gihangyo niini si sheriff Fernando Luncion nga kalimtan una ang pagpatuman sa balaod inay ipatigbabaw ang kalooy sa isigkatawo nga mawad-an sa ilang tagsa-tagsa ka mga panimalay ug walay mabalhinan nga mga relocation sites.
Nagbahad si Luncion nga ilang ipadayon ang demolisyon kun ugaling mapakyas sa pagpaggawas sa temporary restraining order si Judge Algodon.
Sumala ni Luncion nga ila nang gipahibalo si Judge Algodon sa na-oktaba nga demolisyon ug kanunay silang andam nga ipatuman kung unsa man ang kamanduan niini.
Gani, gipasigarbo ni Luncion nga lawas ug katarungan ang iyang dala-dala sa pagpatuman sa demolisyon.
Masaligon si Atty Mordeno nga paboran sila sa 15 ka adlaw nga lugway nga iyang gihangayo sa dili pa ipatuman ang demolisyon.
Si Mordeno miingon nga manghinaut siya nga malooy si Judge Algodon sa kahimtang sa mga residente nga mawad-an og panimalay.
Gipasalig ni Mordeno nga sulod sa 15 ka adlaw, mapangitaan na sa syudad ug lugar nga kabalhinan sa mga apektadong residente.
Samtang giangkon usab ni City Administrator Teddy Sabugaa nga magpabilin una sa evacuation centers ang mga apektadong pamilya sa himoon nga demolisyon.
Matud ni Sabugaa nga adunay pito ka hektarya sa yuta sa Pamalihi, Pagatpat ang mahimong balhinan sa mga apektadong residente apan molungtad sa usa hangtud tulo ka bulan ayha nila kini mapuy-an.
Dugang ni Sabugaa nga anaa lamang sa 164 families ang maka-benepisyo sa socializing housing sa lokal nga kagamhanan.
