Dosientos-uno ka mga pamilya ang natala nga nanghikling gikan sa 10 ka barangay sa Bukidnon, Misamis Oriental ug probinsya sa Camiguin, sukad kagahapong adlawa.
Kini maoy lab-as nga report gikan sa Office of the Civil Defense (OCD-10) sa interbyu sa BOMBO RADYO.
Namahayag si Mabs Galvez, Public Information Officer sa OCD-10 nga sukad kagabie anaa sa BLUE ALERT ang tibook Northern Mindanao, apan sa bandang alas-2 sa kadlawon, giisa ang Orange Rainfall Alert sa Camiguin ug sa lalawigan sa Misamis Oriental.
Sukad kagahapon, ang pagdahili pa lang sa Balingasag ang nareport sa ahensya, ug wala pa makompirmar niini, ang mga landslides sa Jasaan.
Kanselado ang paglupad sa mga commercial flights sa Laguindingan International Airport, sugod alas 4 sa hapon, lakip na ang pagbiyahe sa mga pantalan, sa MisOr, Lanao, ug Camiguin.
Kapin gatus ka mga pasahero ang gibana-bana nga stranded sa mga pantalan.
Gikompirmar sa OCD-10 nga nagpabiling ZERO CASUALTY ang rehiyon batok sa Bagyong Tino.
