CAGAYAN DE ORO CITY – Milungtad sa duha ka tuig ayha nahuman ang kantang “Undang Na” nga gi-compose ni David John Lañas kinsa nahimong kabahin sa 120 ka mga semi-finalist nga napili sa Bombo Music Festival 2020.
Giangkon ni Lañas nga mao kini ang iyang gihimong inspirasyon hinungdan nga mi-UNDANG siya sa paghigugma sa babaye nga alang kaniya, dili mao ang gitagana sa Ginoo.
Dugang niini nga dugay ra unta niya ipaggawas sa publikoo ang maong kanta isip iyang first single apan iya kining gi-preserbar ug miapil siya sa Bombo Music Festival sa pagtoo nga daghan pa ang madasig sa iyang kanta nga “Undang Na”.
Si Lañas usa ka musician ug english-online teacher nga nagpuyo sa Acacia St., Barangay Carmen ning syudad.
Samtang wala magdahom ang estudyante sa University of Science and Technology of the Southern Philippines o USTP nga makasulod isip semi-finalist sa ombo Music Festival 2020 ang iyang gi-compose nga awit nga “Move On”.
Gibutyag ni Angelica Anches nga taga Zone 2,Brgy San Isidro,Balingasag, Misamis Oriental nga gipasa niya ang iyang entry sa katapusang adlaw o deadline sa Bombo Music Festival 2020.
Gani, daghan pa sila’g gipang-utro sa kanta ug maoy iyang interpreter si Connie Marie Jerezon.
Siya miingon nga ang awit nga “Move On” dili lang sa mga manag-uyab nga nagbulag apan angayan usab kining buhaton sa mga tawo nga nahigugma apan walay na’y paglaom.
Sa pikas bahin, milungtad lamang sa usa ka adlaw dihang na-compose sa taga Balongis, Brgy Balulang ning syudad ang awit nga “Dulo sa Dulo” diin nakasulod sa semi-finals.
Si Mark Anthony Flores, 31-anyos miingon nga iyang namugna ang kanta pinaagi lamang sa iyang imahinasyon.
Sumala sa inilang guitarist ug song writer nga maoy iyang gibasehan sa lyrics sa iyang awit ang pamaagi sa mga batan-on nga mahigugma sa karon nga henerasyon.
Gani, gibutyag usab niini nga ikaduha na kini nga higayon nga miapil siya sa Bombo Music Festival.
Dugtong usab niini,bisan nga dili na bag-o alang kang BMF 2018 finalist Winset Rose Jacot ang pag-apil apan wala gihapon niya mapungi nga mangurog dihang nasayran nga nakasulod siya sa semi final round.
Miingon si Jacot nga wala siya magdahom nga maka sulod ang iyang kanta nga ‘Simpleng buhay kasama ka’ apan iya kining giampo sa Ginoo.
Dugang ni Jacot nga gusto niya subli makasulod sa top 12 aron maka-perform balik sa Iloilo City sa Enero 2020.
Kini na ang ikaduhang higayon nga miapil si Winset Rose sa kompetisyon diin una na siyang nahimong kabahin sa final 12 niadtong bulan sa Enero ning tuiga ug mitaktak sa fans ang paglabay’g wedding ring tungod sa migawas nga emosyon sa iyang final performance.
