CAGAYAN DE ORO CITY, Philippines – Ang pinaka-maanyag sa Barangay Bugo maoy midaug sa coronation night sa Miss Cagayan de Oro 2024, nga gilusad didto sa Lim KetKai Atrium, Brgy. Lapasan, Cagayan de Oro.
Kagabie, milutaw ang kalantip sa salabutan ni Miss Bugo Candidate Alyssa Marie Cordova, human siya ang gikoronahan isip ika 59 nga rayna ning syudad.
Ang 59th Edition sa prestihiyosong indigay mitapos sa pag-ila nila Brgy Macabalan Candidate Princess Kyle Rufon isip First Runner Up.
Nakasulod sa final-five sila Gabriella Gil Cristi Alaba sa Brgy Bayabas (2nd runner-up), Desiree Gamolo sa Barangay 32 (3rd Runner-up), ug Jierecah Louise Nicole Taal sa Brgy Consolacion (4th Runner-up).
Gawas sa pagsilbing title holder, gihakot sa kandidata sa Brgy Bugo ang major awards sama sa Best in Gown Design, nga gama ni Boogies Musni Rivera; Best in Evening Gown, ug Best in Swimsuit.
Nakakuha usab sa tolo ka special awards si Cordova nga gilangkoban sa Face of Dr Lee Aesthetics, Miss DITO Telecommunity Choice Award ug Miss Erika Shoeline PH.
Kuyog kang Cordova nga mihakot sa awards, apan wala palari nga makasulod sa top 5, si Joera Asio, ang representante sa Barangay 3. Iyang nasakmit ang Higalaay Rose of Tralee, Miss LA Dental Studio, Miss Sephine’s CDO, ug ang MWell Health & Wellness award.
Susamang pag-ila ang gihatag kang Second Runner Up Gabriella Alaba sa Barangay Bayabas nga misakmit sa Darling of the Press, Miss Elegant Award sa Seda ug CLIMBS Ambassadress for Climate Action.
Ang kandidata sa Barangay Camaman-an nakakuhag duha ka special awards isip Miss Golden Friendship ug MWell Health & Wellness.
Ang 3rd Runner up nga si Gamolo sa Brgy 32 misakmit usab sa MWell Health & Wellness award.
Nahimong winner sa Talk N Text Texters Choice Award si Ellen Grace Abejo sa Barangay Balulang.
Ang First runner up nga si Rufon maoy misakmit sa Best Higalaay Costume, gikan sa Brgy Macabalan.
Samtang maoy giila isip Miss Photogenic si Brgy Kauswagan Candidate Fiah Sharra Masangcay.
