MANILA – Tinguha sa Philippine Olympic Committee o POC nga malabwan ang medal performance sa Pilipinas sa partisipasyon niini sa 2020 Tokyo Olympics sa Japan sa laing hugna sa Olympiada nga didto himoon sa Paris, Pransya ning tuiga.
Gibutyag ni POC chairman Bimbol Tolentino nga makasaysayanon ang partisipasyon sa Pilipinas kay nagsilbing ika-gatos ka tuig na kin sukad miapil sa 1924 Olympics sa susama nga venue.
Kini ang rason nga todo-ensayo ang 22 ka atletang Pinoy nga diin naglakip kang Cagayan de Oro pride Tokyo Olympics boxing silver medalist Carlo Paalam alang sa maong misyon.
Siya miingon nga dugay nang aktibo ang Pilipinas sa Olympics sukad sa pagsugod niini ug unta kini nga tuig makabaton sa dugang medalyang bulawan ang mga atletang Pinoy.
Samtang namahayag usab si Carlo nga unta duyugan sa kahitas-an pinaagi sa mga pag-ampo sa katawhan ang ilang paningkamot ug sakrispisyo nga makakuha sila’g gold medals ning tuiga.
Kini ilabina sa natad sa boksing diin tulo sa mga boksidor ang pulos gikan sa Mindanao nga naglakip kang Eumir Marcial ug Nesthy Petecio.
Una nang gipaubos sa taas nga alerto ang tibuok Pransya diin 45-mil ka pulis ug sundalo ang ikatag epekto sa pagdagsa sa bana-banang 15 milyones ka tawo aron saksihan ang Olympiada.
Hisayrang dili sa indoor apan sikat nga Seine River himoon ang Olympics ceremony diin isakay sa gatos ka bangka ang 10-mil ka atleta sa Hulyo 26 sa sayong gabii France time.
