CAGAYAN DE ORO CITY – Ipaila na ni City Mayor Rolando ‘Klarex’ Uy ug Cagayan de Oro 2nd District Cong. Rufus Rodriguez ang ilang line up sa city councilors sa una ingon man segundo distrito alang sa 2025 elections ning syudad.
Kini human kompirmaha sa mayor nga dunay ilusad nga convention ang duha ka dominant political groups sa Agosto 17 ning tuiga.
Namahayag si Klarex nga sobra-sobra ang mga nagpadayag sa ilang interes rason nga dako niya kining problema.
Apan may gipasaligan usab kini nga kadtong personal niya gihangyo nga mokuyog sa ilang line-up ang segurado nga mauban sa Klarex-Rodriguez ticket.
Maoy nahugon-hugon mobangga sa administrasyon ni Klarex ang kanhi 3-term city mayor sa syudad nga si Atty Oscar Moreno kuyog ang suporta sa partido Padayon Pilipino.
Hisayrang anaa usab ang gamay’ng puwersa ni kanhi Phividec administrator Pompee La Viña sa Bagong Kagayan kinsa unang nagpadayag nga modagan pagbalik kontra kang Klarex ug bisan kang Moreno.
