CAGAYAN DE ORO CITY – Gipakita na sa puwersa ni City Mayor Rolando ‘Klarex’ Uy ug Centrist Democratic Party chairman Cagayan de Oro 2nd District Rep. Rufus Rodriguez alang sa 2025 elections sa dakbayan.
Kini human gilusad na nila ang ONE KAGAY-AN,KATAWHAN UNA SA TANAN coalition atubangan sa sobra 8-mil ka political supporters sa Aquilino Pimentel Jr International Convention Center sa Sitio Tagunao,Brgy Indahag sa syudad kaganihang buntag.
Sa wala pa nakigpulong sila Klarex ug Rufus, mipirma una sila’g manifesto sa ilang kuwalisyon nga gisakihan sa kandidato pagka-kongresista sa unang distrito nga si Carmen Brgy Kapitan Kikang Uy ingon man ang mga konsehales sa syudad.
Namahayag ang duha ka lideres nga gusto nila ipadayon ang ilang pag-serbisyo sa katawhan rason nga gusto nila subli magpapili nga naglakip usab kang City Vice Mayor Jocelyn ‘Bebot’ Rodriguez.
Dumduman nga gilangkuban sa aktibo,bag-o ug nagbalik nga konseho ang mga kandidato pagka-konsehal sa una ug ikaduhang distrito nga gikuha sa Klarex-Rufus alliance.
Hisayrang lauman nga moduso’g sertipiko de kandidatura ang maong mga kandidato sulod sa mga petsa nga Oktobre 1 hangtod 8 ning tuiga sa Commission on Elections.
