CAGAYAN DE ORO CITY – Hatagan sa haom nga tabang sa gobiernong-munisipal ang mga pamilya nga okupante sa inisyal nga pito ka balay nga nahiagom sa damyos sa pag-igo sa ipo-ipo sa Barangay Malingin,Opol,Misamis Oriental.
Kini ang pasalig ni Opol Mayor Atty Jay Bago sa interbyu sa Bombo Radyo kabahin sa gidangatan sa mga pamilya nga residente sa ilang lungsod.
Miingon si Bago nga gitahasan niya ang haom nga buhatan sa lungsod aron masubay ang aktuwal nga naapektuhan sa pinakaunang pag-igo sa ipo-ipo sa maong lungsod kagahapon sa hapon.
Siya miingon nga hinoon walay bisan usa sa mga sakop sa 21 ka pamilya nga nakalas o nasamdan sa hitabo.
Una nang gipadayag sa mga apektadong residente sa Bombo Radyo interview nga unta matabang sila sa munisipyo ilabina nga pipila sa ilang mga balay ang nangalangkat ang atol epekto sa ipo-ipo.
