CAGAYAN DE ORO CITY – Gibaha ang pipila kabahin sa lungsod sa Mambajao,Camiguin.
Kini tungod sa walay hunong nga pagbundak sa ulan resulta sa low pressure area o LPA nga nasiplatan sa General Santos City.
Gibutyag ni Camiguin PDRRMO head Jejomar Bollozos nga miawas ang mga sapa hinungdan nahitabo ang pagbaha ug misulod sa kabalayan ug mga balay patigayon.
Gikompirmar usab ni Bollozos nga gikanselar sa Philippine Coast Guard ang mga biyahe sa lantsa pasulod ug paggawas sa isla tungod sa pagdaot sa panahon.
Samtang nahikling sa PNP ang 21 ka pamilya nga apektado sa lapad nga pagbaha sa sentro nga bahin sa Poblacion,Mambajao,Camiguin.
Gibutyag ni Lt Col Gwen Cinco sa Camiguin Provincial Police Office nga gihikling ang maong mga pamilya aron ma-safety epekto sa pagsulod sa tubig-baha sa ilang mga balay.
Hinoon,gibutyag ni Cinco nga walay kinabuhi nga nakalas o naangol sa hitabo gawas lamang sa nahatag nga perhisyo resulta sa kusog nga pag-ulan kagahapong adlawa.
