CAGAYAN DE ORO CITY-Magsaulog sa bag-ong tuig ang 22 ka pamilya sulod sa evacuation center tungod sa pagkasunog sa 13 ka pinuy-anan diha sa Zone 6,Brgy Bonbon sa syudad kagahapon sa hapon.
Kini human unang gibutyag sa Bombo Radyo ni Daisy Manahan,brgy health worker o BHW nga giingong nagsugod ang kalayo sa gipuy-ang balay ni
Evelyn Sarol.
Hinoon,gilayong giatiman sa brgy officials ang mga biktima sa sunog ilabina nga daghang mga bata ang anaa sa Bonbon Elementary School sa maong lugar.
Una nang gibutyag sa testigo nga si Sherwin Rosales nga nakit-an niya nga nagdula-dula sa kalayo ang duha ka batang babaye sa silong sa balay ni Sarol hinungdan sa sunog.
Samtang wala mapug-ngi sa ginang nga si Juana Ogil nga makapatulo sa iyang luha sa dihang kabahin ang iyang dos-andanas nga balay nga nasunog ning syudad.
Gibutyag ni Ogil nga ihangad na lamang niini sa kahitas-an ang subli nilang paningkamot aron mabalik ang ilang normal nga kahimtang.
Wala’y nasalbar si Ogil nga kabtangan kay nagtrabaho kini atol sa pag-ulbo sa sunog.Dugtong usab niini,gibutyag ni Bonbon Brgy Lope Matildo nga gilayon gimando ni Brgy Kapitana Jocelyn Biongcog ang pag-atiman sa mga biktima.
Gani,abli usab sa bisan unsa nga tabang ang brgy aron madugang paghatag sa mga nasunugan.
Samtang nagpadayon ang pag-imbestigar sa Bureau of Fire Protection o BFP sa hinungdan sa pagkasunog sa 13 ka balay diha sa Zone 6,Brgy Bonbon sa syudad.
Kini bisan nga gisulti sa pipila ka testigo nga may nagdula sa kalayo hinungdan sa maong sunog.
Gibutyag ni BFP investigator SFO1 Imelda Barasan nga hinoon wala’y natala nga naangol nga mga residente atol sa maong sunog.Natala sa 300-mil pesos ang structural damage sa maong sunog.
Subli gialerto usab ni Barasan ang publiko nga kanunay dili magkumpiyansa batok sa mga pag-ulbo sa sunog.
Samtang moduso’g resolusyon si Kag Zaldyo Ocon aron paspas matabangan ang 22 ka pamilya nga apektado sa sunog.
Kini atol sa subli nila pagbalik sa session sa konseho sa Enero 2018.
Si Ocon kinsa chairman sa urban poor committee sa konseho miingon nga makig- koordinar ang syudad kang Bonbon Brgy Kap Jocelyn Biongcog aron mapahimutang ang mga ayuda alang sa mga nasunugan.
