CAGAYAN DE ORO CITY – Maubsan pa ang tsansa sa election related violence nga hayan mahitabo sa pipila ka lungsod nga init ang away sa mga kandidato sa Lanao del Sur sa taliabot May 12 elections.
Gibutyag ni 1st ID commander Major General Yegor Rey Baroquillo Jr nga epekto kini sa pagboluntaryong pagtahan sa mga sibilyan sa 230 ka nagkadaiyang klase sa armas gikan sa distrito dos sa probinsya ngadto sa Armadong Kusog sa Nasud.
Miingon si Baroquillo nga tungod sa dugang naarmas nga anaa sa kostudiya sa kagamhanan,mas migamay ang kahigayunan nga mabutang sa dakong kagubot ang lalawigan sa Lanao Sur.
Kini tungod kay gamay’ng ihap na lang sa mga indibidwal ang ilang gihulat nga mobuluntaryo usab sa pagtahan sa mga gikuptang mga armas.
Dumduman nga ubay-ubay sa mga lungsod sa Lanao del Sur nga ubos sa Bangsamoro Autonomous Region in Muslim Mindanao o BARMM ang anaa sa hugot nga pagtutok sa Commission on Elections tungod sa pipila ka bayolenteng panghitabo epekto sa milabay’ng mga eleksyon.
Hisayrang gihingusgan sa gobierno ang pagpatuman sa Small Arms and Light Weapons management program sa Office of the Presidential Adviser on Peace, Reconciliation and Unity aron masumpo ang kaylap nga illegal nga mga armas sa pipila ka bahin nasud. (Kuha ni R.U).
