GIKALIPAY ni Atty. Spencer Palin sa Liceo de Cagayan University ang kasamtangang pagsulay sa pag-consolidate sa nagkadaiyang bersyon sa Anti-Political Dynasty Bill nga nasumite sa Senado ug sa Kamara.
Sumala sa datos, adunay 24 ka bersyon sa maong panukalang balaod nga naapilar o nasumite, apan hangtod karon wala pa’y bisan usa niini ang naaprubahan.
Matod ni Palin, ang paghiusa sa mayor nga mga probisyon maoy hinungdan nga adunay nahitabo nga mga public hearings ug consultations, nga giila niya isip importante nga lakang sa proseso sa paghulma sa balaod.
Gipasabot sa LDCU law professor nga pinaagi sa public consultations, makuha ang pulso ug opinyon sa katawhan ilabi na sa pagtakda kon unsang level sa limitasyon ug konsiderasyon ang angay aron matawag nga usa ka politiko nga anaa sulod sa political dynasty.
Alang kaniya, ang klarong depinisyon ug pagsabot sa maong probisyon maoy yawe aron maporma ang usa ka epektibo ug patas nga Anti-Political Dynasty Law. (James Oliver)
