CAGAYAN DE ORO CITY-Nagbaton na sa traumatic mental disorder o pagkabuang ang anaa sa 25-mil ka internal displaced people o IDPs nga anaa sa nagkadaiyang evacuation centers sa Lanao provinces ug Iligan City.
Kini tungod sa kapin bulan na nga kagubot diin padayong gigukod sa militar ang mga teroristang ISIS-Maute sa Marawi City,Lanao del Sur.
Gibutyag ni Lanao del Sur Provincial Health Officer Dr Alinader Minalang nga anaa sa nagkadaiya nga traumatic level ang mga biktima diin may mga pasyente nga anaa na gayud sa pagkaliso sa ilang pangisip.
Dugtong niini,gikompirmar usab ni Lanao del Sur 2nd District Board Member Abdulhamid Umpa Amerbitor ang gindaghanon sa mga apektadong residente nga nag-antos sa mental disorder.
Kini ang rason nga nanawagan ang ilang syudad sa tabang medical pinaagi sa mga pyschologist ug mga psychiatrist nga unta mahiling ang ilang mga nagsakit nga mga sakop.
