CAGAYAN DE ORO CITY, Philippines – Koral nalang ang nabilin sa mga tangkalan ug piggery farms sa Batangas tungod sa pagsaka sa kaso sa African Swine Fever (ASF).
Gikompirmar sa Department of Agriculture ang halos dobli nga pagsaka sa ihap sa mga barangay nga apektado sa ASF, ning bulan sa Agosto.
Namahayag si DA Assistant Secretary ug Spokesperson Arnel de Mesa nga dunay pagpaspas sa pagkuyanap sa kaso, kundiin, ning bulana, mitala na sa 251 ka mga barangay ang apektado, itandi sa 150 sa bulan sa Hulyo ning tuiga.
Gikompirmar usab sa kalihim ang pagpatuman sa state of emergency sa mga babuyan sa Luzon nga halos kada adlaw nangamatay ang ilang mga binuhing baboy.
Base sa emergency procurement sa ahensya, anaa na sa 10,000 ka mga bakuna ang ipalugwa ug gimando ang hugot nga checkpoint sa pagbiyahe sa mga buhi ug karneng baboy.
Una niini, gitin-aw ni de Mesa nga pwedeng carrier sa bayrus sa ASF ang tawo, apan nipis ang tsansa sa animal to human transmission.
Pagtin-aw kini sa DA human halos wala nay gapalit sa karneng baboy sa Batangas tungod sa kahadlok nga sila matakdan sa ASF.
