CAGAYAN DE ORO CITY – Boluntaryong mitahan sa militar ang 26 ka mga sakop sa rebeldeng NPA nga nag-operate sa bukid nga bahin sa Cagayan de Oro, Misamis Oriental ug Bukidnon.
Mitahan ang mga rebelde sa 65th IB, Philippine Army sa pagpangulo ni Lt. Col. Benjamin Pajarito Jr. atol sa gihimo nga Medical and Dental Mission sa Brgy. Mambuaya ning syudad.
Matud ni 1Lt Krescelle Renoblas sa 65th IB nga bitbit sa mga rebelde sa ilang pagtahan ang 18 ka mga nagkadaiyang klase sa armas nga gilangkuban sa M16 armalite rifles, Garrand rifles, shotgun ug 45 caliber pistols.
Pulos mga miyembro sa Guerilla Front 12 sa CPP-NPA-NDF ang mga mitahang rebelde.
Samtang, nakadawat na sa P50, 000 nga livelihood assistance ug 15,000 nga immediate assistance gikan sa gobyerno ang 14 sa 26 ka mga sakop sa rebeldeng NPA nga mitahan.
Sa ekslusibong pakighinabi sa Bombo Radyo, gibutyag sa usa sa mga rebelde nga si Ka Jojo nga wala na nila makaya ang gutom ug kakapoy nga nasinatian sa pagtago-tago sa kabukiran hinungdan nga mibalik sila sa sabakan sa gobyerno.
Dugang pa niini nga dili na nila makaya ang kasamok nga gihimo sa ilang mga kauban partikulante na ang ilang extortion activities.
