Gipasalamatan ni Israeli Prime Minister Benjamin Netantanyahu si United States President Donald Trump sa paglusad sa airstrike sa nuclear facilities sa Iran.
Gihimo ni Netanyahu ang pagpasalamat human mismo si Trump ang misugilon sa ilang pag-atake ug plano nga pahunungon ang nuclear activities sa Iran.
Lakip sa gi-atake sa US Troops ang ang mga pasilidad sa Natanz, Fordow, ug Arak, nga giilang kritikal sa nuclear program sa Iran.
Giila ni Netanyahu nga makasaysayon ang tubag ni Trump sa hulga sa Iran nga gamiton ang ilang armas nuclear kung musawdaw ang Amerika sa gubat.
Subay sa intelligence report sa Iran, nahitabo ang atake Hunyo 18, human wala dawata sa Irans Supreme Leader Ayatollah Khamenei ang tanyag ni Trump nga “conditional surrender”. Ang pagmagahi sa kadagkuan sa Iran maoy nakapalagot kang Trump busa napugos kini nga sirad-an ang tanan negosasyon ug mipalanog nga gusto niya ang kompletong pagpukan ug kadaugan batok sa Iran.
Sa pagkutlo ning balita, misaka pa sa 263 ka sibilyan ug 154 ka security personnel ang patay sa pag-atake sa Israeli Defense Force (IDF) sa Iran. Mireport ang Iranian Health Ministry nga kapin sa 1,300 ang samaran, ug kasagran mga sibilyan.
Ang mga lugar nga grabe ang kadaot naglakip sa Tehran, Qom, Isfahan, ug Shiraz, diin gipuntirya sa Israel ang mga pasilidad militar ug nukleyar.
Sa susamang adlaw, dinhi sa Pilipinas, milusad sa lihok protesta ang mga progresibong pundok agig suporta sa pagkondinar sa China ug Russia sa gilusad nga pag-atake nga Amerika sa Iran.
