𝐍𝐄𝐖𝐒 𝐔𝐏𝐃𝐀𝐓𝐄 | 28-anyos nga babaye, patay human miambak sa Atugan Bridge sa Impasugong, Bukidnon
IMPASUGONG, BUKIDNON – Patay ang usa ka 28-anyos nga babaye human kini miambak gikan sa Atugan Bridge sa Sitio Kiasin, Barangay Capitan Bayong (o Patulang), Impasugong, Bukidnon, kaganihang hapon, February 17, 2026.
Giila ang biktima nga si Claudine Gantao Putis, 28-anyos, dalaga, ug residente sa Poblacion, Impasugong.
Sumala sa mga report, pasado alas-5:00 sa hapon dihang nakit-an ang biktima sa maong tulay. Adunay mga saksi nga kasamtangang nagbiyahe ang misulay sa pagpugong ug pagduol kaniya, apan kalit kining miambak sa maong lawom nga bahin sa tulay. Sa wala pa ang insidente, giingong adunay gikaestorya sa telepono ang biktima ug iya pang gilabay ang iyang identification card (ID).
Daling miresponde ang Impasugong Police ug ang Municipal Disaster Risk Reduction and Management Office (MDRRMO) rescue team. narekober ang lawas sa biktima banda alas-6:40 na sa gabii. Sa pagkakaron, ang patayng lawas ni Putis anaa na sa Rural Health Unit (RHU) sa lungsod sa Impasugong alang sa dugang pagsusi.
