CAGAYAN DE ORO CITY – Wala na’y pagdasok sa mga tawo ug nalikayan na nga dunay makuyapan makakuha lamang sa cash aid nga gitanyag sa DSWD-10 ngadto sa mga tinun-ang kabus apan angayang tambangan sa ilang pagtungha dinhi sa rehiyon.
Kini ang gitaho ni DSWD 10 information officer Roshiel Galia alayon sa 2-mil 902 ka estudyante nga nahatagan sa cash ayuda sa napulo ka payout areas kagahapong adlawa.
Miingon si Galia nga sama sa ubang mga rehiyon,hapsay na ang pagdalikyat sa mga tawo gawas lamang nga may pipila ka ‘walk-ins’ nga namasin nga masingit sa opisyal nga listahan sa naka-schedule sa cash aid release kagahapong adlawa.
Samtang dili lamang mabalaka kadtong anaa sa listahan sa DSWD 10 nga benepesaryo sa cash aid assistance nga pakyas makatunga ug makakuha sa ilang bahin kagahapong adlawa.
Kini tungod kay pabiling prioridad pa gihapon sila sa sunod nga pag-release kay napasa naman ang ilang mga pangalan sa kauluhan.
Gihimo ni Galia ang katin-awan kay wala nila makab-ot ang 3-mil 500 ka estudyante sa ilang payouts kay daghan daghan ang pakyas makatunga tibuok adlaw kagahapong adlawa.
Pagpasabot niini nga padayon ang ilang pag-validate ug ebalwasyon sa daghang aplikante online alang sa maong programa.
