CAGAYAN DE ORO CITY – Gikatugaw sa kapolisan ang nabaniug nga giingong pagdagit sa pito wala ilhing kalalakin-an sa tulo ka nga negosyanteng Intsik nga corporate owners sa Soar High Construction Supplies Trading Warehouse sa Zone 9,Brgy Cugman sa syudad kagahapon sa buntag.
Kini human unang nagpatala sa Cugman Police Station ang mga empleyado sa maong patigayon aron ma-dokumento ang pagdala sa nagpatoong taga-Bureau of Immigration and Deportation o BID sa ilang mga amo nga sila Xiao Kang;Leo Co Bautista ug Kang Yang.
Apan namahayag si City Police Office spokesperson Lt Col Evan Viñas nga sa ilang gihimong koordinasyon sa BID Cagayan de Oro District Office,nasuta nga lehitimo ang operasyon sa dul-an napulo ka tawo nga naggikan pa sa kauluhan.
Nasuta nga over staying ang usa sa mga Intsik ug may nasupak usab sa mga lagda sa pag-negosyo sa Pilipinas ang laing duha sa mga dinakpan.
Samtang nangayo’g despensa ang Bureau of Immigration and Deportation nga naghatag alarma ang hilom nga pagsulod sa ilang mga personahe aron dakpon ang tulo ka Chinese nationals nga nag-negosyo dinhi sa dakbayan.
Miingon si Cagayan de Oro District Office Alien Control Officer Felipe Alano Jr nga naka-mission order ang pagdakop sa maong mga Intsik tungod sa pipila ka kasupakan sa immigration laws sa nasud.
Apan siya namahayag nga unta dunay ensakto nga koordinasyon ang ilang central office personnel kay mismo usab kini ang walay kasayuran sa maong operasyon.
Nasuta nga naghatag abiso ang BID-Manila sa maong operasyon sa unang semana pa ning bulana.
