CAGAYAN DE ORO CITY- Samaron ang tulo ka opisyal sa barangay dihang gi-ambush sa wala mailang mga suspek sa Upper Dioyo 1,Brgy 18, Concepcion Misamis Occidental.
Giila ni Fr Edilberto Baculi ang mga biktima nga sila si Brgy Kagawad Emilio Paglinawan, Carlito Pata ug si Dodo Tumasan, kinsa anaa sa talandugon nga kahimtang human makaangkon sa samad-pinusilan sa iyang dughan.
Gi-ambush ang mga biktima sa wala mailang suspek samtang padulong sa meeting kauban si incumbent Barangay Captain Mario Manday.
Nakaangkon sa nagkadaiyang samad sa kalawasan ang mga biktima kinsa lay ministers usab sa simbahan diin padayon pang gitambalan ning panahona.
Samtang nagtoo si Baculi nga election related ang motibo sa pagpang-ambush.
Siya miingon nga igo lang nadamay sa away pulitika ang tulo ka brgy kagawad ug mga lay minister ilabina nga naila sila nga supporters ug volunteers sa usa ka kandidato pagka-mayor sa maong lugar.
Hugot nga gikondenar sa pari ang hitabo ilabina nga mga tarong nga tawo ang biktima.
Dugtong niini,gipangita sa kapolisan ang tulo ka suspek sa pagp-ambush sa pipila ka brgy officials ug lay ministers sa simbahan.
Sumala ni Concepcion Police Station commander Police Capt. Jude Evangelista nga election related ang motibo sa pagpamusil tungod kay ilado nga supporters sa kapikas sa kasamtangang mayor sa maong lugar nga nagpapili sa umaabot piliay.
Si Evangelista miingon nga narekober nila sa crime scene ang bala sa 9mm pistol, .45 kaliber pistol ug carbine.
Sa pagkakaron, padayon pa ang manhunt operation sa kapulisan batok sa mga suspetsado.
