CAGAYAN DE ORO CITY -Pabor sa katawhan kon daghan ang magpapili pagka-mayor sa umaabot piliay sa dakbayan.
Kini ang nakita ni Citizens Watch Good Governance 10 convenor Atty Antonio Soriano nunot sa paglutaw sa pangalan nila ni kanhi Mayor Oscar Moreno ug kanhi Phividec administrator Pompee La Vina nga maoy mobangga kang City Mayor Klarex Uy sunod tuig.
Miingon si Soriano nga mas makahigayon ang katawhan sa pagpili sa labing angayan nga mangulo sa city hall kon daghan ang modagan sa maong katungdanan.
Pulos nagbaton sa ensaktong kuwalipikasyon ang tulo ka dagkong pangalan nga nanglutaw alang sunod piliay.
Sa miaging 2022 elections, midaug si Klarex sa labaw nga 32-mil 241 gikan sa iyang nakuha nga 160-mil 312 botos itandi kang La Viña nga dunay 128-mil 071.
Kini ang rason nga naikag si Pompee nga kontraho’g balik si Klarex ilabina nga dili ‘landslide victory’ ang kadaugan niini batok kaniya.
Samtang si Moreno magbalik pagka-mayor kay nahinugon usab kini sa kahimtang sa dakbayan nga daw napasagdan sa pagdumala ni Uy.
Si Moreno,siyam ka tuig nga mayor sa dakbayan ug natuboy nga mosunod kaniya si Klarex apan paglabay sa pipila ka bulan human sa piliay,nagpatigbabaw ang mga intriga sa isig-kapanig ug hingpit sila nagka-kontra na.
