CAGAYAN DE ORO CITY – Suspendido sa magkalahing 90 ka adlaw ang tulo ka organic officials sa Cagayan de Oro Water District (COWD) ning syudad.
Kini subay sa dokumento nga nakuptan sa Bombo Radyo diin pirmado ni interim COWD General Manager Fermin Jarales nga imbestigaran ang tagsa-tagsa ka giingong kalapasan sa mandong-administratibo batok sa maong mga empleyado.
Gitumbok ni Jarales ang mga gipang-suspenso ug gikasuhan sa grave abuse of authority subay sa kasupakan sa 2017 Rules on Administrative Cases in the Civil Service sila COWD Senior Corporate Counsel Atty Angeli Avenido;finance managers Vanessa Chiu ug Evelyn Vasallo.
Gipasabot sa IGM nga angay suspendido una ang tulo ka COWD officials samtang pending pa ang pagdungog ug dugang imbestigasyon sa kasong grave abuse of authority nga gipang-atubang nila.
Nagsumikad ang pasangil batok Avenido kay giingong nagmando kini’g palugwa sa 10 milyones pesos nga 2nd tranche post bond nga unang gimando sa korte aron malugwa ang writ of preliminary injunction batok COBI cutting water supply nga giingong walay pagtugot sa interim COWD officials.
Samtang si Vasallo giingong nagdumili usab pagsunod sa hangyo sa interim officials nga mohatag sa iyang electronic signature alang sa bank signatories hinungdan sa pagka-delatar sa ilang mga transaksyon sulod sa COWD.
Sa panig usab ni Chiu,giingong nagpadala kini’g komunikasyon sa Local Water Utilities Administration nga walay pag-uyon gikan sa interim COWD officials.
Kini ang rason nga gipatubag tagsa-tagsa ang maong COWD officials sa mga sumbong nga ilang gipang-atubang.
Dumduman nga gipangbutang ang interim officials subay sa lakang sa LWUA kay gimanduan usab ni Pres Bongbog Marcos nga sulbaron ang daghang suliran nga gisagubang sa COWD.
Apan wala kini sunda sa regular board of directors,regular general managers ug organic employees kay alang nila walay basehan ang gihimo sa LWUA pagpanginlabot sa mga kalihukan sa COWD.
Gani,nabasura ang kasong gipasaka sa regular BODs batok interim officials sa korte apan miapelar sila ug naghulat sa bag-ong ilugwa nga hukom sa lain na nga sala sa husgado.
Nakadugang usab sa kayagaw kay naglugwa’g legal opinion ang Dept of Justice apan subay lang gihapon sa mga probisyon sa Presidential Decree 198 nga maka-takeover lang ang LWUA sa COWD kon dunay dakong obligasyong pinansyal nga lisod mabayran.
Gilayong gisang-atan usab kini sa konseho sa dakbayan pinaagi sa pagduso’g resolusyon nga angay tahuron sa LWUA ang legal opinion sa DoJ.
Apan alang sa pipila ka abogado nga nagsunod sa isyu, angayang mismo ang Office of the Government and Corporate Counsel ang molugwa sa legal opinion subay sa mandato kanila sa balaod kabahin sa bangi sa regular ug interim COWD officials.
Nagsugod ang kontrobersya sa COWD kay dili nila bayran ang sobra 400 milyones pesos nga utang ngadto sa Cagayan de Oro Bulk Water Incorporated kay alang kanila wala sila’y obligasyon bisan kon dunay kontrata nga pirmado alang niini.
Nagkahiusa usab ang city government,mayoriya sa konseho ug pipila ka regular COWD BoDs sa pagsulti nga disbintaha ang gisudlan nga kontrata sa previous board members tali COBI rason angay ma-amendar kay looy daw ang katawhan.
