CAGAYAN DE ORO CITY – Nag-atubang sa kasong pagbaligya sa ilegal nga droga ang tulo ka suspek nga nadakpan sa kapolisan sa magkalahing higayon sa Bukidnon.
Gibutyag sa PNP-Bukidnon,unang nadakpan ang 31 anyos nga si alyas Wael nga nagpuyo sa Malaybalay City diin nakuha kini pinaagi sa buy-bust operation sa Zone 3,Impalutao,Impasug-ong.
Nakompiskar gikan sa dinakpan ang 55 gramos nga gitoohang shabu nga dunay estimated market value nga 374-mil ug libo ka pesos nga marked money.
Nasuta nga gikan sa Misamis Oriental ug lungsod sa Maguing,Lanao del Sur ang ilegal nga droga nga gigamit sa suspek nga ibaligya sa pipila ka lugar sa Bukidnon.
Samtang nasignit usab sa laing lower units sa PNP ang duha ka suspected shabu pushers sa nga naglihok sa Misamis Oriental.
Kini gilakipan sa 43 anyos nga babaye nga si alyas Bubbles ug 27 anyos nga kaipon niini nga si alyas Pablo nga nagpuyo sa probinsya.
Saysay sa PNP-Misamis Oriental nga nabawian sa ilang mga operatiba ang duruha sa 15 gramos nga gitoohang shabu nga nagkantidad sa 102-mil pesos ug 500 pesos nga buy-bust money.
