CAGAYAN DE ORO CITY – Mag-atubang sa kasong pagsupak sa Presidential Decree 1865 o illegal nga paghupot sa krudo ang tulo ka sibilyan nga naipit sa checkpoint operation sa Purok 1,Brgy Spring,Kibawe,Bukidnon gikan sa Maguindanao del Sur.
Kini human naharang sa checkpoint ang bongo truck diin dunay tulo ka sakay nga indibidiwal ug gitoohang 2-mil 520 litros nga krudo nga bana-banang nagkantidad 133-mil 560 pesos.
Giila sa Kibawe Municipal Police Station ang mga dinakpan nga sila alyas Norhan,29 anyos nga residente sa Galakit,Pagalungan;alyas Nurmohaydin,25 anyos nga taga,Linandangan nga pulos sakop sa Maguindanao del Sur ug alyas Musa,34 anyos nga gikan sa North Cotabato.
Giharang sila tungod kay pagsusi sa mga pulis,walay napresentar nga mga dokumento sa dose ka drums nga gisudlan sa krudo.
Tungod sa hitabo, gidakop ang tulo ug gikustodiya ang ilang trak kuyog ang kargamento samtang gihikay ang tukmang kaso nga iduso sa piskalya.
