Gikonsiderar sa Armed Forces of the Philippines (AFP) nga malampuson ang ilang tolo ka adlaw nga maritime partol sa West Philippine Sea (WPS).
Namahayag si Lt Commander Christian Malabanan, Operations Officer – BRP Andres Bonifacio nga taliwala sa daghang pagsulay sama sa tailing operations sa China sa Likas ug Kota Island, sulod sa Kalayaan Island Group (KIG) wala mihunong ang ilang team sa radio challenge aron sitahon ang mga barko gikan sa Chinese Coast Guard.
Sa milabay’ng adlaw, gisugdan sa Philippine Navy ang ship-to-shore drill sa Likas Island.
Usa kini ka klase sa misyon kundiin mihimo’g military maneuver ang mga sundalo aron dad-on ang ilang mga ekipo, ug mga kahimanan gikan sa barko ngadto sa baybayon.
Samtang didto sa Kota Island, ang AFP mipahigayon sa communication check aron masiguro nga dunay signal ang maong lokasyon subay sa nakalatid sa ilang operational readiness, ug mipakusog sa ‘morale’ sa ilang mga tropa nga nakabase sa isla.
Lakip sa gigamit sa AFP sa ilang maritime patrol sa West Philippine Sea, BRP Miguel Malvar (FFG-06) – Usa ka guided missile frigate nga bag-o lang nadawat sa Philippine Navy.
Kini adunay modernong radar ug armas alang sa anti-surface, anti-air, ug anti-submarine warfare.
Kauban niini ang BRP Cabra (MRRV-4409) – Usa ka multi-role response vessel nga gigamit sa Philippine Coast Guard alang sa maritime domain awareness ug humanitarian assistance and disaster response (HADR).
Ikatolo ang BRP Andres Bonifacio (PS17) – Usa ka patrol ship nga nagbuhat ug maritime situational awareness ug communication check sa Panata Island.
Ang BRP Bonifacio maoy makasugat sa Chinese Navy vessel nga nag-monitor sa ilang lihok.
Gigamit usab sa AFP ang ilang air asset sama sa Philippine Air Force AW-109 Helicopter nga gitumong alang sa surveillance ug reconnaissance sa rehiyon
