CAGAYAN DE ORO CITY – Panalipdan sa tulo ka dinakpan ang ilang mga kaugalingon atubangan sa husgado nunot sa pasangil nga sila namaligya’g illegal nga droga.
Kini human nadakpan ang mga suspek sa magkalahing higayon gumikan sa maong pasangil.
Unang naglusad sa hiniusang operasyon ang Libona Police Station ug Bukidnon PNP Intelligence Unit diin nadakpan ang duruha nga nagtangag sa pangalang alyas Apo,28 anyos ug MacMac,34 anyos nga pulos nagpuyo sa maong probinsya.
Nakompiskar gikan sa duruha ang 22 gramos nga gitoohang shabu nga adunay kantidad nga 149-mil 600 pesos ug ubang paraphernalia.
Samtang nabingwit usab sa mga operatiba sa Divisoria Police Station ang 59 anyos nga suspek sa buy bust operation sa Brgy Pagatpat ning syudad.
Nabawian si alyas Toto sa 40.4 gramos sa shabu nga may bana-banang kantidad sa 247-mil 720 pesos.
Dugtong niini,gidayeg ni Police Regional Office 10 Director Brig Gen Jaysen De Guzman ang kalampusan sa ilang mga tropa batok sa gidiling droga.
Tungod niini,atubangon sa mga dinakpan ang pagsupak sa Comprehensive Dangerous Drugs Act of 2002 sa korte.
