CAGAYAN DE ORO CITY, Philippines – Reclusion Perpetua o tibook kinabuhi nga pagkapriso ang gi-atubang nga sentensya sa tolo ka mga kanhi kadete sa Philippine Military Academy (PMA) nga unang gi-akusahan nga mipatay pinaagi sa brutal nga paghazing kang 4th Class Cadet Darwin Dormitorio, tuig 2019.
Kagahapon, gilugwa sa sala ni RTC Branch 5 Presiding Judge Ligaya Itliong-Rivera ang 42-page decision aron hukma’g guilty sa kasong pagpatay sila kanhi PMA Cdets 3rd Class Shalimar Imperial Jr ug Felix Lumbag Jr.
Samtang gikombikto sa pagsupak sa anti-hazing law si kanhi PMA Cadet 3rd Class Julius Carlo Tadena.
Silang tolo gimanduan sa korte nga pabayrun sa 75,000 pesos isip civil indemnity; P75,000 moral damages; ug P25,000 temporate damages.
Pabayron sa korte ang tolo sa P100,000 alang sa attorney’s fee.
Samtang si Tadena gimanduan nga mubayad sa 2 milyon pesos sa pamilya ni Dormitoryo.
Hisayran nga human gipakanaug nga desisyon, nabalot sa tensyon ang court room human pulos mihilak ang duha ka panig. Hustisya alang sa pamilya Dormitoryo ang napagawas nga hukom.
Dumduman nga namatay si Dormitorio niadtong tuig Setyembre 19, 2019 nga nabulit ang lawas sa mga samad ug tumang paghubag sa likod nga bahin sa iyang mga paa, sulod sa hospital sa ilang tunghaan.
