(Update) CAGAYAN DE ORO CITY-Kasong pagsupak sa anti-illegal gambling law ang giatubang sa tulo ka barangay officials nga unang nasikop sa kapolisan sa Barangay Bunawan,Iligan City.
Giila ang mga dinakpan nga sila si Association of Barangay Council o ABC Federation President Cesarve Siacor;Bunawan Brgy Capt Efren Semblante ug Barangay Peacekeeping Action Team o BPAT Roque Cobrado nga pulos nagpuyo sa maong dakbayan.
Gibutyag sa Bombo Radyo ni PNP regional spokesperson Supt Lemuel Gonda nga nasikop ang tulo ka opisyal tungod sa gilusad nga one time bigtime operation sa Iligan City Police Office alayon sa mando ni Presidente Rodrigo Duterte.
Nakuha gikan sa mga suspek ang 20 ka buhing manok pangsabong,P2-mil cash money ug ubang cock fighting paraphernalia.
Hinoon,gilauman nila nga makalinggawas ra gihapong temporaryo ang mga dinakpan tungod kay mahimong makapiyansa sila gumikan sa kagaan sa ilang kaso nga atubangon.
