CAGAYAN DE ORO CITY, Philippines – Gibuhian na sa Hamas ang tulo ka bihag nga Israelis niadtong Sabado, Pebrero 15.
Pasado alas-10 sa buntag, gibuhian sa militanteng Hamas ang mga bihag gikan sa Khan Younis sa Gaza ug gitunol kini sa mga personahe sa International Red Cross.
Luwas nga nakagawas sa maong syudad ang mga bihag dihang hingpit nga nakostodiya sa Israeli Defense Force nga mihatod kanila pabalik sa Israel.
Lakip sa mga gibuhian sila si Alexander Troufanov, Yair Horn, ug Sagui Dekel-Chen.
Ang pagpagawas sa tulo ka Israelis maoy baylo sa pagpagawas sa kapin sa 360 ka Palestinianong piniriso nga gipahimutang sa Gaza.
Mahinumduman nga sa miaging semana, mibadlong ang Hamas nga ihunong ang binayloay sa mga piniriso tungod sa pasangil nga padayong nangatake ang Israeli military sa pipila ka bahin sa Gaza ug mipasidaan nga dili ipadayon ang pagpabalik sa ilang nahuptan nga nahibiling hostages.
Kini nga mga hostages, nadagit sa mga militante sa unang adlaw sa pag-atake sa Israel niadtong Oktobre 7, 2023.
