CAGAYAN DE ORO CITY-Gibatikos sa 4th ID,Philippine Army ang pagsunog sa 20 ka rebeldeng New People’s Army o NPA sa tulo ka cargo trucks nga kargado sa mga pinya sa Brgy Pelaez,Claveria,Misamis Oriental kagahapong adlawa.
Gitumbok ni 4th ID spokesperson Capt Joe Patrick Martinez nga ang pakyas paghatag sa kompanyang Del Monte Philippines sa revolutionary tax ang hinungdan nga gisunog sa mga rebelde ang maong mga ekipo.
Samtang gi-depensa ni kanhi CPP-NPA-NDF regional officer Alfredo Mapano alyas Ka Pares ang laing pagsunog sa iyang mga kauban sa mga ekipo nga nagserbisyo sa kompanyang Del Monte Philippines sa Brgy Pelaez,Claveria,Misamis Oriental.
Namahayag si Ka Pares nga mahunong lamang sa mga rebelde ang mga atake kon hingpit nang masilyohan ang peace agreement tali gobierno ug komunistang grupo.
Gani,gitakdang mo-biyahe na usab si Ka Pares kuyog ang ubang delegado sa gobierno ug mga komunista padulong sa The Netherlands alang sa ikalima nga hugna sa peace talks sunod semana.
Samtang gisupak ni Claveria Mayor Meraluna Salvaleon- Abrogar nga pagpangilkil ang motibo sa mga rebelde pagsunog sa heavy equipment nga gipanag-iya sa dakong pineapple company sa maong lugar.
Namahayag si Abrogar maoy gisupak sa mga rebelde ang pag-okopar sa kompanya sa luna nga iya sa mga lumad sa maong dapit.
Gibutyag usab ni Abrogar nga walay nahitabong evacuation sa mga residente nga nagtuong dunay mahitabong crossfire tali sa NPA atol sa pag-abot sa tropa sa 58th IB Phil Army sa ilang dapit.
