CAGAYAN DE ORO CITY-Mag-atubang sa kasong pagsupak sa revised penal code ilabina sa article 170 kon pagsul-ob sa military uniforms and insignia ang dugang tulo ka sakop ni USAFFE founder Atty Ely Pamatong sa piskalya ning syudad.
Kini human nasapon ug nasikop sa Task Force Oro nga nagsul-ob sa uniporme nga adunay naka-imprenta nga PNP diha sa Brgy 33 sa syudad sa miaging adlaw.
Giila ang mga suspek nga sila si Captain Raymon Bagongon, 24, ulitawo, taga Cabulawan, Lagonglong, Misamis Oriental; 2nd Lieutenant Ricardo Biscayno, 36, minyo, taga Baloy ug Romeo Cagaanan, 73, minyo, taga Ramon-Chavez Street, Brgy 30 ning syudad.
Namahayag si Task Force Oro commander Army Col Roy Orquia nga wala tugti sa gobierno ang pundok ni Pamatong nga masul-ob sa paramilitary uniform sukwahi sa gipamugos nila nga suportad sa kadagkuan sa AFP sa Camp Aguinaldo.
Samtang gisaway sa grupong USAFFE ang pagsikop sa Task Force Oro sa ilang laing tulo ka kauban nga igo lamang naghatod sa komunikasyon sa mga estasyon sa radyo ug telebisyon batok sa mga opisyal sa syudad.
Kini human gi-kuwestiyon ang grupo nila ni USAFFE member Capt Raymon Bagongon sa mga otoridad kon nganong nagsul-ob sila sa uniporme nga wala tugti sa militar ug kapolisan.
Apan namahayag si 2nd Lt Ricardo Biscayno nga wala sila’y nasupak sa balaod kay igo lamang kini naghatag suporta sa gobierno sa kampanya batok kriminalidad.
Sa miaging semana,nasikop usab sa militar ang laing unom ka sakop sa USAFFE sa magkalahi nga brgy sa syudad tungod sa pagsul-ob sa militay uniforms.
