CAGAYAN DE ORO CITY – Dungan nga gi-ordinahan ni Cagayan de Oro Archbishop Jose Cabantan,D.D.,SSJV sa pagka-pari ang tulo ka magsoon nga ubos sa kongregasyon sa Sacred Stigmata of Our Lord Jesus Christ diha sa San Agustin Metropolitan Cathedral ning syudad kaganihang buntag.
Giila ang magsoong pari nga sila si Reverend Fathers Jessie James Avenido,Jestonie Avenido ug Rey Avenido kinsa naggikan sa simpleng magtiayon lamang nga residente sa Brgy Barra,Opol,Misamis Oriental.
Miingon ang kamagwangang igsoon nga si Fr Jessie James nga giila nila nga dakong grasya ang gihatag kanila nga bokasyon aron ipalig-on pa ang pagsangyaw sa ebanghelyo sa Ginoo.
Mihangyo usab kini sa pag-ampo sa ilang mga kabanay ug katawhan aron magpabilin ang kadasig ug mabatukan ang mga kahuyang nga moabot sa tagsa-tagsa nila ka kinabuhi.
Kini ang labing unang higayon nga dunay tulo ka magsoon nga dungan gi-ordinarhan sa pagka-pari sa arkidiyososes sa dakbayan.
