CAGAYAN DE ORO CITY-Gipaubos na sa kustodiya sa CIDG-10 headquaters sulod sa Camp Evangelista ang tulo ka miembro sa Maute group nga mibiyahe gikan sa Cagayan de Oro City sakay sa barko apan nasapon pag-abot sa pantalan sa Iloilo City.
Matud ni Philippine Coast Guard-Northern Mindanao head Capt. Leo Panopio nga ila unang ipaubos sa medical check up ang mga suspek nga sila si ljajid Pangumping Romato, 20 anyos gikan sa sa Sabayle, Iligan City; igsoon nga si Farida Pangumping Romato, 23 anyos sa Brgy Carmen ning syudad ug Abdulrahman Serd Dimakutah, 25 anyos gikan sa Lanao del Sur ingon man ang hinigugma niini nga si Farida.
Si Panopio miigon nga ilang gibiyahe ang mga suspek sakay sa Philippine Coast Guard highlander plane padulong sa syudad.
Giangkon ni Panopio nga naglisod sila sa pag-ila nga sakop sa mga Maute group ang tulo ka suspek nga nadakpan sa Iloilo City Port.
Si Panopio miingon nga layo ra ang hitsura sa mga suspek itandi sa mga litrato nga gipaggawas sa kapolisan.
Tungod niini, gikumpirma gayud sa ilang ahensiya ang identity sa upat ka mga personahe sa pagseguro nga sila mga rebelde.
Una niini, nakita sa Philippine Coast Guard sa CCTV ang upat nga susama sa hulagway sa mga miyembro sa Maute.
Gipanghimakak sa mga suspek ang alegasyon nga magsabwag sila’g kagubot sa kauluhan.Dugtong niini,gihangyo sa PNP-10 nga i-monitor ang tanang mga bakwit sa kagubot sa Marawi City nga mihikling sa nagkadaiyang lugar sa tibook Mindanao.
Matud ni PNP regional director C/Supt Agripino Javier nga dako ang iyang pagtoo nga dili lamang sa Cagayan de Oro ug Iligan City nakasukod ang mga miembro sa Maute group apan lakip sa mga kasikbit nga lugar.
Dugtong niini, gimando ni Javier sa mga lokal nga kagamhanan nga i-monitor matag oras ang evacuees sa ilang lugar.
Una niini, nagtoo si Javier nga dili magsabwag og kagubot ang mga Maute members kundi gusto lang nila nga isibat ang ilang kaugalingon sa kagubot.
Gipanawagan ni Javier sa publiko nga gikinahanglan sa otoridad ang ilang tabang ug kooperasyon aron masikop ang ubang Maute members.
Si Javier miingon nga mao na kini ang insaktong panahon sa pagtinabangay aron masumpo ang dautang plano sa mga terorista.
Gawas niini, nanawagan usab si Javier sa publiko nga magbinantayon ug magma-igmat batok sa mga Maute-ISIS.
