CAGAYAN DE ORO CITY- Nasikop sa kapolisan ang tulo ka miembro sa giingong notoryus nga organized crime group nga Minister Criminal Gang sa Barangay Taglimao,Cagayan de Oro City.
Kini human hingpit nang naipit sa kapolisan ang mga suspek nga dugay nang nagtago tungod sa giatubang nila nga kaso sa balaod ning syudad.
Giila ang mga suspek nga sila si Jimrey Sablada;Wilson Daanoy ug Jerry Rangcasajo nga pulos residente sa maong barangay.
Gibutyag ni Bombo Radyo ni Lumbia Police Station commander Sr/Insp Dennis Ebsolo nga gitumbok nila ang Minister Criminal Gang nga nalambigit sa sunod-sunod nga dagkong kremin sa bukirang bahin sa barangay sa syudad sa miaging katuigan.
Gigamit nga basehan sa kapolisan pagsikop sa mga suspek ang standing search warrant of arrest sa kasong frustrated murder nga pending sa sala ni Regional Trial Court (RTC) Branch 38 Presiding Judge Emmanuel Pasal.
Una nang gitumbok sa mga otoridad nga sagad sa mga nahimo nga criminal activities sa mga suspek ang kabarangayan sa Besigan;Tuburan,Tigpanoloan ug silingan pang dapit sa dakbayan.
Hisayrang tuig 2004 pa gisugdan sa kapolisan pagpangita ang mga suspek hangtod nalukong sila sa ilang hideout sa arangay Taglimao sa syudad.
