CAGAYAN DE ORO CITY – Dili na bag-o sa Cagayan de Oro City Police Office o COCPO ang kamanduan ni PNP chief Gen Nicolas Torre III nga 3 minutes response time nga gipatuman sa tibuok nasud.
Kini tungod kay dugay na nga nagpatuman niini ang COCPO sukad pa sa milabay’ng mga kadagkuan sa PNP.
Namahayag si Capt Emilita Simon,tigpamaba sa COCPO nga gumikan sa nationwide marching order sa bag-ong PNP chief,ila usab e-review ang pagpatuman niini nga mohaom sa gisitar nga standard sa Kampo Krame.
Nag-unang tuyo niini nga dali ang pagtubag sa kapolisan sa bisan unsa nga kremin nga itaho sa katawhan.
Apan giklaro usab ni Torre nga kining maong lakang ang ipatuman lamang sa mga sentrong bahin sa matag-dakbayan ug dili sa mga kabukiran nga mokaon sa taas nga panahon.
