CAGAYAN DE ORO CITY – Wala kasuhi sa kapolisan ang ilang kaubang pulis nga sakay sa pribadong sakyanan nga gikabangga sa motorsiklo nga dunay sakay nga tulo ka magbarkada nga pulos-patay sa Purok 4,Brgy Punta,Santiago,Talisayan,Misamis Oriental.
Giila ni Talisayan Police Station commander Police Maj. Stephen Latar ang iyang kaubang pulis nga si Police Maj. Rixell Torayno,42 anyos nga taga-Brgy Lapasan ug kasamtangang nadestino sa Iligan City Police Office.
Miingon si Latar nga nakakab-ot sa amicable settlement ang panig sa mga pamilya sa mga biktima ug sa maong pulis hinungdang wala na’y kaso nga napasaka sa piskalya.
Una nang gibutyag sa panig ni Torayno nga gikan sila dinhi sa syudad ug padulong sa Gingoog City apan pag-abot sa Talisayan,nabanggan sa motorsiklo.
Namatay sa maong aksidente ang drayber sa motorsiklo nga si Alejandro Sevilla,25 anyos nga taga-Medina samtang ang backriders naglakip kang Riza Mae Golosino,18 anyos ug laing 15 anyos nga pulos taga-Brgy Pampangon,Talisayan pulos ning lalawigan.
