CAGAYAN DE ORO CITY – Naila na ang tulo ka sakop sa rebeldeng New People’s Army o NPA nga napatay sa magkalahing engkuwentro tali sa operasyon sa militar ug kapolisan sa Gingoog City,Misamis Oriental.
Mismo si Armed Forces of the Philippines Eastern Mindanao Command (AFP-EastMinCom) commander Lt Gen Greg Almerol ang miila sa mga napatay’ng NPA combatants nga sila si Renerio Dablo alyas Edoy kinsa gitumbok nga lider;magtiayong Jelan alyas Matrix ug Darling Pinakilid alyas Yandy nga nahupot gihapon sa importanteng papel sa armadong kalihukan.
Namahayag si Almerol nga ang pagka-neutralize sa maong mga rebelde ang resulta sa gitawag nga ‘strong synergy’ sa security forces sa nasud.
Nakompiskar usab sa maong mga operasyon ang duha ka M-16 rifles gikan sa posisyon ni Edoy samtang granada ug kalibre 45 nga armas gikan sa magtiayong Pinakilid.
Sumala sa 4th ID,Philippine Army nga ang maong mga patay’ng lawas sa mga rebelde ang gihatagan na sa pahiluna nga haya sanglit biktima lamang gihapon sila sa pagpanghaylo nga mugna sa kalihukan.
Walay pag-angkon ang militar ug bisan ang kapolisan kon dunay samaron o nakalas sa ilang mga sakop atol sa magkalahing engkuwentro sa lalawigan sa miaging semana.
Hisayrang natigayon ang maong mga engkuwentro sa Sitio Minlanag,Barangay Lawaan ug Barangay Odiongan nga pulos nakabase sa maong syudad.
