CAGAYAN DE ORO CITY-Nasikop sa hiniusang law enforcement operation sa militar ug kapolisan ang tulo ka sakop sa rebeldeng New People’s Army o NPA sa Barangay Licoan,Sumilao,Bukidnon.
Kini human nasiplatan ang mga suspek nga may gitabanga’g alsa nga sako padulong sa usa ka balay sa maong lugar.
Gibutyag ni 403rd IB spokesperson Capt Norman Tagros nga gilayong gisitar sa Bukidnon Provincial Police Safety Company ug 1st Special Forces Batallion ng Philippine Army personnel ang mga suspek hinungdan nga nasikop.
Giila ang mga suspek nga sila si Romeo Banawon Salilo,49;Roger Dokina Ayombo,40 ug Rey Sarilla Lomingka,25, nga pulos nagpuyo sa maong dapit.
Gibutyag ni Tagros nga kabahin sa nabawi ang duha ka granada;baby armalite rifle;M-14 rifle;rounds sa nagkadaiyang mga bala ug short firearms.
Nabawi usab sa mga otoridad ang mga personal nga kagamitan sa mga suspek ang celphones ug subersibong mga dokumento.
Kasuhan sa patung-patong nga kaso ang mga suspek nga detinado sa mini-cell sa kapolisan tungod sa pagbaton sa mga kontrabando.
