CAGAYAN DE ORO CITY-Mitahan sa militar ang dugang tulo ka miembro sa rebeldeng New People’s Army o NPA gikan sa nagkadaiyang lungsod sa Bukidnon.
Miingon si 403rd IB civil military operations head Capt Norman Tagros nga kabahin sa mga mitahan sila alyas Jordan, Bugoy ug Milit nga gikan sa Sangay ng Partido sa Lokalidad and Militia ng Bayan sa CPP-NPA Guerilla Front 68 North Central Mindanao Regional Committee sa Bukidnon.
Dugang ni Tagros nga dala sa pag-surrender sa mga NPA member ang caliber 30 M2 Carbine rifle, 30 M1 Garand rifle, M79 grenade launcher ug mga bala.Silang tulo ang kabahin lamang sa siyam ka NPA members nga mitahan balik sa gobierno sa maong probinsya sa miaging semana.
Samtang nadawat na sa 21 ka kanhi NPA members ang 1.5 milyon pesos nga gisaad sa gobierno nga livelihood program bugti sa ilang pag-surrender diha sa Bukidnon sugod tuig 2017.
Miingon si Tagros nga ang maong pondo alang sa mga NPA surrenderee ang gikan sa Enhanced Comprehensive Local Integration Program o ECLIP.
Dugtong niini, giawhag ni Tagros ang ubang mga rebelde nga mobalik sa gobierno ug talikdan ang pakigbisog nga igo ra sila gisaad-saaran apan wala mahatagi’g katumanan.
