Misurrender ang tolo ka miyembro sa New People’s Army (NPA) sa managlahing yunit sa 4th Infantry (Diamond) Division.
Gitahan sa mga rebelde ang lima ka high-powered firearms sa mga lalawigan sa Bukidnon ug Misamis Oriental.
Pinaagi sa gipakusog nga peace and security operations sa 8th Infantry Battalion nga gipanguluhan ni Lt. Col. Marc Bien Stevens J. Deslate, ug sa suporta sa 1st Special Forces Battalion, ubos sa pagdumala ni ni Lt. Col. Emilio T. Bautista, duha ka NPA ang misurender ug mihatag sa impormasyon sa lokasyon sa ilang gitaguan nga armas.
Narekober ang 2 ka M16 rifles ug 2 ka M653 carbines sa unang hideout sa Sitio Buso, Poblacion, Cabanglasan, Bukidnon.
Nakalot ang dugang mga armas sa ikaduhang hideout sa Mt. Talahiran, Barangay Caburacanan, Malaybalay City.
Narekober sa lokasyon ang usa ka M79 grenade launcher nga adunay 4 ka high explosive ammunitions.
Sa laing bahin, niadtong Hunyo 29, usa pa ka NPA member ang misurender sa 58th Infantry Battalion nga gipanguluhan ni Lt. Col. Leoncito I. Grezula Jr.
Didto sa Kalhaan Forward Operating Detachment sa Barangay Minalwang, Claveria, Misamis Oriental, iyang gitugyan ang usa ka M16 rifle, lima ka magasin, ug 50 ka bala.
Gibutyag ni Major General Michele B. Anayron Jr., Commander sa 4ID, nga ang maong pagsurender nagresulta sa padayon nga focused military operations ug sa pagsalig sa mga nahibilin nga NPA members sa sinseridad sa gobyerno nga tabangan sila nga mubalik sa normal ang ilang kinabuhi.
Gidugang pa ni Anayron nga ang pagkadiskubre ug pagkakupot sa mga armas, usa ka dakong timailhan nga mihuyang pa’g samot sa kapasidad sa NPA sa paghimo sa dautang kalihukan sa Bukidnon ug kasikbit nga mga lugar.
Gipasidunggan usab niya ang kaisog sa mga misurender ug ang paningkamot sa mga tropa sa pagpangadyi sa kalinaw ug seguridad sa katawhan.
