CAGAYAN DE ORO CITY-Patay ang tulo ka mga tawo human misukol sa mga otoridad atol sa pagsilbi sa search warrant batok sa usa ka drug suspek sa Zone 1,Brgy Sinai, Laguindingan Misamis Oriental.
Giila ni Misamis Oriental Provincial Police Office spokesperson Police Insp Princess Joy Enriquez ang mga supsek nga sila Dodong Pindulangan,prime target ug duha ka mga sakop niini nga sila Carlo Dagondon ug John Lago.
Naka-angkon sa daghang igo-pinusilan ang mga suspek human milungtad sa dul-ag 10 ka minutos ang pagbinayluay sa buhing bala batok sa mga operatiba sa Libertad PNP,Provincial Drug Enforcement Unit ug Laguindingan PNP.
Hinoon walay samaron sa kapolisan sa maong hitabo.Samtang mi-depensa si Laguindingan Police Station commander Police Sr/Insp Rolly Tabuclin batok sa isyung “overkill” ang pagpatay sa tulo ka drug suspect sa ilang pagsilbi sa search warrant kagabii.
Namahayag si Tabuclin nga bukas ang ilang istasyon alang sa mga nabiyaang kabanay sa mga suspek nga buot moreklamo batok sa ilang mga operatiba.
Una niini, nagtoo si Tabuclin nga nagsilbing hideout sa mga suspek ang balay nga gipuy-an tungod kay nagbaton kini sa CCTV Camera sa gawas nga bahin.
Lakip sa narekober ang usa ka dakong putos nga gitoohang dunay sulod nga druga nga mitimbang sa 5 gramos, mga dagkong armas, mga bala ug granada.
