(Update 1) CAGAYAN DE ORO CITY – Mikalas na sa tulo ka tawo ang mga pagbaha dala sa shearline o panagtagbo sa init ug bugnaw nga hangin sa Northern Mindanao partikular sa dakbayan sa Oroquieta,Misamis Occidental.
Giila ni Oroquieta City Mayor Lemuel Acosta ang mag-amahang namatay nga si Mario Sambiog,70 anyos ug Elenita Calamian,43 anyos kinsa pulos natabunan sa midahili nga yuta gumikan sa walay hunong nga pag-ulan kagahapong adlawa.
Gawas niini,laing residente nga edad 60 hangtod 70 ang patay gihapon nga naggikan sa lungsod sa Aloran sa probinsya.
Siya miingon nga sobra 155 ka pamilya usab ang gihikling ug pipila ka mga tulay ang nagguba gumikan sa kalamidad.
Dugtong niini,nakaabot na sa atensyon ni House Speaker Martin Romualdez ang kahimtang sa katawhan sa maong lalawigan.
Gibutyag ni Misamis Occidental 1st District Cong. Jason Almonte nga pasiunang balor sa 2 milyones pesos nga tabang ang ilugwa sa buhatan ni Romualdez alang sa mga biktima sa kalamidad.
Hisayrang apil usab sa apektado sa grabeng pagbaha ang Tangub City,Ozamiz City ingon man ang kalungsuran saTudela,Aloran,Jimenez,Sinacaban,Clarin,Plaridel,Lopez Jaena ug Don Victoriano.
