CAGAYAN DE ORO CITY – Mikalas sa tulo ka kinabuhi sa tawo ang pag-igo sa baha gumikan sa pag-ulan nga dala sa trough sa Low Pressure Area o LPA sa ubay-ubay’ng lungsod sa Lanao del Norte.
Kini subay sa gilugwa nga impormasyon sa provincial govt sa maong lalawigan.
Kabahin sa apektado ang 2-mil 190 ka pamilya o 8-mil 231 ka indibidwal gikan sa pito ka lungsod.
Kini gilakipan sa Kolambugan, Tubod, Baroy, Lala, Kapatagan, Salvador ug Magsaysay.
Apan sa panig sa Office of the Civil Defense 10,bugtong gikompirmar pa lamang nila ang usa ka 8 anyos nga bata nga namatay gumikan sa maong kalamidad.
Si OCD 10 asst regional director Gilbert Conde miingon nga anaa pa lamang usab sa unom ka lungsod ang kompirmadong apektado diin ang Tubod ang dunay labing dako nga damyos sa pagbaha sa miaging gabii.
Sa milabay’ng shearline nga miigo sa Northern Mindanao,walay natigayong mga pagbaha sa Lanao del Norte ug Iligan City.
