CAGAYAN DE ORO CITY-Patay nang nakit-an ang tulo ka batan-on nga unang gipanawagan dinhi sa Bombo Radyo nga pulos nagpuyo sa Brgy Tambubong,Villanueva,Misamis Oriental ning semanaha.
Kini human pulos nagbaton sa pinusilan ang ulo ang mga biktima nga si Clifford Abales, 21-anyos; Vicente Bionin, 24-anyos ug Don Greymar Andales,23-anyos nga pulos nagpuyo sa lalawigan.
Gibutyag ni Scene of the Crime Operatives o SOCO medical legal officer Dr Christian Caballes nga ang pinusilan sa ulo gamit ang gitoohang 9mm pistol ang hinungdan sa gilayong kamatayon sa mga biktima nga gipanghulog sa pangpang sa Brgy Sta Inis,Malitbog,Bukidnon sa miaging adlaw.
Narekober sa crime scene ang duha ka empty shell sa 9mm caliber pistol.Kasamtangang gidala sa punerarya sa Bollozos ang patay’ng lawas sa mga biktima human maha-was sa crime scene kagabii.
Samtang namugos ang pamilya sa usa sa tulo ka suspected salvage victims nga matarong ug wala kini atraso sa balaod diha sa Tagoloan,Misamis Oriental.
Kini ang gisaysay sa Bombo Radyo ni Elvie Abales kinsa igsoon ni Cliffor Abales nga kabahin sa gipusil-patay nga nakit-an sa pangpang sa Brgy Sta Inis,Malitbog,Bukidnon.
Gibutyag ni Abales nga nagsilbi lamang habal-habal driver ang iyang ika-dose nga manghod hinungdan nakurat na lamang sila sa nahitabo niini.
Gitumbok usab ni Abales nga ang pipila ka pulis gikan sa Tagoloan Police Station kuyog ang duha ka brgy tanod ang midampot sa tulo ka biktima tungod sa reklamo sa babaye nga giku-utan nila sa miaging semana.
Milugwa usab ang report nga duha sa mga biktima ang pulos sa sakop sa notoryus nga grupon sa Batang Mindanao o BM-29 ning syudad.
