CAGAYAN DE ORO CITY – Atubangon sa van driver ang mga kasong kriminal sa piskalya kon walay makab-ot nga kasabutan tali sa mga pamilya nga namatyan ug samaron sa dugu-ong aksidente sa Purok 4,Poblacion,Gitagum,Misamis Oriental.
Kini human nagkabanga ang tulo ka pribadong sakyanan nga gilangkuban sa duha ka motorsiklo ug pribadong van sa maong dapit sa miaging gabii.
Namahayag sa Bombo Radyo si Gitagum Police Station deputy commander Major Lt Wilben Damson nga kabahin sa namatay si Ranny Minister,taga-Brgy Besigan ug laing duha ka menor de edad.
Sumala sa imbestigasyon,kalit miliko sa wala nga bahin sa opposite lane ang laing motorsiklo nga gimaneho ni Jerry Clarabal gikan sa Laguindingan padulong sa Gitagum hinungdang nasugat niini ang pasulod sa Cagayan de Oro nga si Minister kuyog ang duha ka angkas.
Tungod kay managsama nga nakurat sa maong lihok dalan,nahiagom sila sa disgrasya hinungdang nalatayan sa van nga gimaneho ni John Chris Acal nga residente sa Barangay Maranding, Lanao del Norte si Minister ug laing duha ka menor de edad rason sa ilang kamatayon.
Gilayong gidala usab sa OWWA-Alubjid Hospital ang mga samaron nga naglakip kang Evan Mae Tantuhan ug Clarabal diin sila pulos na luwas ang kahimtang.
Gibutyag ni Damson nga gihikay na nila ang kasong reckless imprudence resulting into multiple homicide,physical injuries ug damaged to properties isip kabahin sa proseso sanglit gilauman gihapon nila nga dunay pagsulod sa amicable settlement.
