CAGAYAN DE ORO CITY – Patay ang tulo ka aktibong pulis sa dugu-ong disgrasya dihang mibangga ang gimaneho nila nga motorsiklo ngadto sa kasugat nga trak sa national highway sa Purok 2,Brgy Pigcarangan,Tubod,Lanao del Norte kaganihang kadlawon.
Subay sa pasiunang imbestigasyon ni Patrolman Miller de la Cruz,traffic investigator sa Tubod Police Station nga naila ang mga biktima nga sila PNP members Cpl Samanodin Mamarinta Panganting,legal ang edad,minyo-taga Brgy Pened,Poona Piagapo;Cpl Juderay Sabate Rubillar,29 anyos,minyo nga residente sa Purok 1,Brgy Abaga, Lala ug Cpl Frederick Denn Morales Espra,33 anyos,minyo nga molopyo usab sa Brgy Taguictic,Kapatagan nga pulos nakabase sa Lanao del Norte.
Saysay sa mga testigo ngadto kang De la Cruz nga kamulo nga maneho si Espra sa gisakyan nila nga motorsiklo diin nakaangkas sila Rubillar ug Panganting dihang gikasungag nila ang kasugat nga trak nga gisakyan usab ni Jonre Rosie Banuelos,34 anyos,minyo nga taga-Purok 4,Brgy Guba,Clarin,Misamis Occidental sa maong bahin sa dalan.
Tungod sa kakusog sa epekto sa panagbangga,nahiagom sa grabeng mga samad ug bun-og ang mga biktima rason dali gipangdala mga personahe sa Tubod Municipal Disaster Risk Reduction Management Office sa provincial hospital sa lungsod sa Baroy.
Deklarado nga pulos dead on arrival ang mga biktima sa mga doctor nga nag-atiman kanila.
Kasamtangang detinado si Banuelos sa kapolisan sanglit gamay’ng bun-og ug samad lamang ang nahiaguman sa maong aksidente.
Gihulat pa sa kapolisan kung unsa’y mga plano sa mga pamilya kabahin sa nahitabo sa maong mga biktima.
