CAGAYAN DE ORO CITY – Gisikop sa mga otoridad ang tulo ka pulis nga suspek sa pagka-missing sa kanhi close-in bodyguard nga police officer ni Iligan City Mayor Celso Regencia.
Kini human gidudahan nga sila si Senior Master Sgt Baguldol;Master Sgt Labial ug Cpl Padayhag ang responsable sa pagka-missing ni Cpl PJ Capangpangan nga naka-assign sa Regional Special Operations Group-Iligan City.
Miingon si Iligan City information officer Joe Pantoja nga gi-aresto ang tulo kay sila ang ulahi nga gikauban ni Campangpangan sa wala pa kini nagsugod pagkawala niadtong miaging semana.
Gibutyag ni Pantoja nga una nang giangkon ang mga suspek ang mipatay ug milubong sa biktima apan negatibo nga ma-rekober ang patay’ng lawas niini.
Nasayran nga magkauban ang biktima ug mga suspek sa usa ka quarry business sa Iligan City.
Samtang nagdumili una pagkompirmar ang Police Regional Office -10 nga dunay pulis nga gitabanga’g patay sa upat ka miembro sa Iligan City Police Office sa dakbayan sa Iligan.
Kini human unang gibutyag sa local govt unit sa Iligan nga na-missing si Campangpangan diin giingong sila si Baguldol;Labial ug Padayhag nga pulos nadestino sa Iligan City Police Station 2 ang responsable niini.
Namahayag si PRO 10 spokesperson Lt Col Mardi Hortillosa nga wala pa kini makadawat sa opisyal nga report gikan sa Iligan City PNP.
Gibutyag ni Hortillosa nga bugtong makompirmar niini nga nadakpan si Padayhag apan tungod sa kasong murder sa tuig 2018.
Gihimakak usab niini nga naka-kustodiya sa Camp Alagar ang tulo ka pulis nga giakusahan sa pagka-missing ni Campangpangan.
Samtang abli usab ang Bombo Radyo alang sa paghatag katin-awan sa maong mga pulis nga gitumbok sa LGU-Iligan City.
