CAGAYAN DE ORO CITY-Gihimakak ni PNP Regional Director C/Supt. Timoteo Pacleb ang report nga talandugon ang kahimtang sa mga pulis nga sakop sa San Fernando,Bukidnon.
Kini human labaya’g granada sa wala mailang mga suspek ang ilang headquarters sa Brgy Jalapitan Purok-1 San Fernando kagabii.
Gibutyag ni Pacleb nga tulo lamang sa iyang mga pulis ang samaron nga gikan sa 1003rd Mobile Force Company gumikan sa hitabo.
Gimando na ni Pacleb ang pagdakop sa mga suspek nga mihimo sa kremin.Samtang gilayong mihimo’g hot pursuit operation ang Bukidnon Provincial Police Office batok sa mga responsable sa paglabay’g sa eksplosibo sa headquarters sa 1003rd Mobile Force Company sa Brgy Jalapitan Purok-1 San Fernando, Bukidnon.
Gibutyag ni Supt Jiselle Longgakit,spokesperson sa Bukidnon PNP nga dili pa nila masulti kon sakop ba sa New Peoples Army kon NPA ang milabog sa granada.
Hinoon,gikompirmar ni Longgakit nga dili talandugon ang kahimtang sa ilang mga pulis.
Giklaro ni Longgakit nga dili related sa kalag-kalag ang nasampit nga pagpamomba.
